पोखरा

पृथ्वी राजमार्गको तनहुँ खण्डमा अचाक्ली सडक दुर्घटना भएपछि दुर्घटनाको ‘हटस्पट’ को पहिचान गरिने भएको छ । जोखिमयुक्त स्थान पहिचान गरी प्राविधिक पक्षको अध्ययनसँगै सुधारका आवश्यक उपाय अवलम्बन गर्न लागिएको हो ।

पृथ्वीराजमार्ग अन्तर्गत तनहुँ खण्डमा पाँच प्रमुख जोखिमयुक्त स्थानको पहिचान गरिने तनहुँका प्रमुख जिल्ला अधिकारी रामकृष्ण अधिकारीले बताए । सडक विस्तारको क्रममा दुर्घटनाको संख्या निकै बढेको उनको भनाइ छ ।

जिल्ला ट्राफिक प्रहरी कार्यालयको समन्वयमा जोखिमयुक्त स्थान पहिचान गरी प्राविधिक पक्षको अध्ययन गरिनेछ । सुधारका आवश्यक उपायहरु अवलम्बन गर्न मुग्लिन पोखरा सडक विस्तार आयोजना (पूर्वी) र (पश्चिम) खण्डलाई निर्देशन दिएको प्रमुख जिल्ला अधिकारी अधिकारीले उल्लेख गरे ।

पृथ्वीराजमार्गको तनहुँ खण्डमा पर्ने बढी दुर्घटनाग्रस्त क्षेत्रहरुको तुलनात्मक अवस्थाको विश्लेषण गरिनेछ । सरोकारवालाको सुझाव अनुसार दुर्घटना न्यूनीकरणका लागि आवश्यक पहल हुने जनाइएको छ । सडक स्तरोन्नतीसँगै दिनकै दुर्घटना भएपछि अहिले यात्रुलाई सास्ती बढेको छ ।