पोखरा

पोखरा महानगरपालिकाले असोज १ गतेदेखि सेवा सुचारु गर्ने भएको छ । जेन–जी प्रदर्शनकारीले न्यूरोडमा रहेको महानगरपालिकाको मुख्य प्रशासनिक भवनमा आगो लगाएदिएपछि जलेर ध्वस्त भएको छ ।

महानगरको प्रशासनिक भवनको भौतिक संरचना र जिन्सि सामाग्री नष्ट भएपछि अहिले सेवा बन्द छ । आगामी बुधबारदेखि विभिन्न स्थानबाट महानगरले सेवा सुचारु गर्न लागेको हो ।

पृथ्वीचोकमा रहेको दमकलको भवनमा मेयर धनराज आचार्य, उपमेयर मञ्जुदेवी गुरुङको कार्यकक्ष बनाएर सेवा दिइने महानगरपालिकाले जनाएको छ । दमकलबाटै प्रमुख प्रशासकीय अधिकृत, सार्वजनिक लेखा समिति, कानुन, सरसफाई र सूचना प्रविधि शाखा खडा गरेर सेवा दिइनेछ ।

सभागृह चोकमा रहेको पोखरा सभागृहमा पनि प्रमुख प्रशासकीय अधिकृतको कार्यकक्ष रहनेछ । प्रशासन, राजस्व र सहरी विकास महाशाखाको सेवा अब पोखरावासीले सभागृहबाट पाउनेछन् । भण्डार, तथ्याङ्क, उजुरी फस्र्यौट, विपद्, अभिलेखीकरण, पञ्जीकरण र लेखा शाखासँगै महानगरीय प्रहरी बल पनि सभागृहमा रहनेछ ।

ड्यामसाइडमा रहेको शिक्षा महाशाखामा आर्थिक प्रशासन महाशाखा र कोष प्रशासन शाखा रहेको छ । यहाँ सहकारी शाखा, श्रम तथा रोजगार शाखा र व्यवसाय प्रबद्र्धन केन्द्रलाई लगिनेछ ।

सामाजिक विकास महाशाखाले सृजनाचोकमा रहेको पूरानो आफ्नै भवनबाट सेवा दिनेछ ।

न्यूरोडमा रहेको पूर्वाधार महाशाखामा योजना, आन्तरिक लेखा परीक्षण, भूमि प्रशासन, खरिद शाखा रहनेछन् ।

जेनी–जी प्रर्दशनमा पोखरा महानगरपालिकासँगै सहरी क्षेत्रमा रहेका अधिकांश वडा कार्यालय पनि जलेका छन् । अहिले वडा कार्यालयहरु स्थानीयवासीको ढाडसमा सरसफाई गर्न जुटेका छन् । प्रदर्शनकारीले मेयर धनराज आचार्यको घरमासमेत आगो लगाएका थिए ।

काठमाडौं

कांग्रेसका महामन्त्री गगन थापाले कांग्रेस बदल्ने र सुधार गर्नेबारे १६ मिनेट लामो भिडिओ सन्देश जारी गरेका छन्।

‘पार्टीका साथीहरूमा अपिल- हामी सच्चिनेछौं, अनि झन् बलियो भएर उठ्नेछौं’ भन्दै महामन्त्री थापाले शुक्रबार जारी गरेको भिडिओ सन्देशमा पार्टीको गति र मति जिम्मा लिएर मिलाउने उल्लेख छ।

उनले पार्टी शुद्धीकरणका लागि साथ खोजेका छन्।

‘हामीभित्र भएको सारा फोहोरहरू सफा गरौं, सारा दागहरू मेटाऔं, कांग्रेस यस्तो संस्थाको रूपमा प्रस्तुत गर्छौं- हामी कानुनको शासनभित्र रहेर काम गर्छौं। कुनै पनि व्यक्ति कांग्रेस सदस्य भएकोले गर्दा राज्यबाट केही अतिरिक्त सुविधा प्राप्त गर्दैन,’ उनले भने।

जहाँ पनि पार्टीको मानिस चाहने र विश्वविद्यालयसमेत दलीयकरण हुँदा मानिस रिसाएको उनको भनाइ छ।

‘कांग्रेस पार्टी अब नेपाली समाजलाई र राज्यलाई तीब्र दलीयकरणबाट बाहिर निकाल्छ, हामीलाई तपाईंको साथ भने चाहिन्छ, यो गर्ने हो,’ उनले भने, ‘अर्को, पार्टीको पुनर्संरचना। यत्रा भ्रातृ र शुभेच्छुक छन् पार्टीमा तर भदौ २४ गते हामीले के महसुस गर्‍यौं? निरिहता। हाम्रो पार्टी गुटउपगुटमा टुक्राटुक्रा भएको छ। यसलाई हामीले बदल्ने हो। विधानमा रहेका पार्टीको तह अब चाहिँदैन। पार्टीले छानेका व्यक्ति नेतृत्व र उम्मेदवार हुने हो अब। पार्टीमा नचाहेका संस्थाहरू नराख्ने, स्वतन्त्र ढंगले चल्न दिने। यति गर्‍यो भने पार्टी नागरिकतर्फ फर्कन्छ।’

घर र पार्टी कार्यालय आगोलागी गर्न आउँदा र सभापति शेरबहादुर देउवामाथि आक्रमण गर्न आउँदा कांग्रेस कति खोक्रो भएको रहेछ भन्ने देखाउने उनले उल्लेख गरेका छन्।

पोखरा

पोखरामा शनिबार विहानसम्मलाई कर्फ्यू आदेश जारी गरिएको छ । शुक्रबार साँझ ७ बजेदेखि लागू हुने गरेर शनिबार विहान ५ बजेसम्मलाई कर्फ्र्यू आदेश जारी गरिएको हो ।

पोखरा महानगरपालिकाको वडा नम्बर १ देखि ३३ सम्म यो आदेश लागू हुनेछ ।

स्थानीय प्रशासन ऐन, २०२८ को दफा ६ (क) बमोजिम आवतजावत गर्न, भेला, जुलुस, प्रदर्शन, सभा, बैठक, घेराउ गर्न नपाउने गरी कर्फ्यू आदेश जारी गरिएको प्रमुख जिल्ला अधिकारी रुद्रादेवी शर्माले बताइन् । कर्फ्यू अवधिमा अत्यावश्यक सेवा एम्बुलेन्स, शव वाहन, दमकल, स्वास्थ्यकर्मी, सुरक्षाकर्मी, सञ्चारकर्मीका सवारी साधनहरु सञ्चानलन हुन पाउनेछ ।

शनिबार विहान ५ बजेदेखि १० बजेसम्म अत्यावश्यक कार्यका लागि आवतजावत गर्न सकिने जिल्ला प्रशासन कार्यालयले जनाएको छ । शुक्रबार विहान १० बजेदेखि साँझ ५ बजेसम्म पनि पोखरा महानगरपालिकाको ३३ वटै वडामा निषेधाज्ञा जारी गरिएको थियो ।
पोखराको माछापुच्छ्रे, अन्नपूर्ण, रुपा र मादी गाउँपालिका क्षेत्रमा भने कर्फ्यू र निषेधाज्ञा लगाइएको छैन ।

तनहुँ

जेन–जी समूहको प्रर्दशनका क्रममा तोडफोड र आगजनी हुदाँ तनहुँमा ३१ भवनमा क्षति पुगेको छ । सरकारी र निजी गरेर ३१ भवनमा क्षति पुगेको हो ।

जिल्ला प्रहरी कार्यालय तनहुँले संकलन गरेको प्रारम्भिक तथ्याङ्क अनुसार सरकारी कार्यालयका ४ वटा भवन पूर्ण रुपमा क्षति भएको छ । १७ वटामा आशिंक र एउटा भवनमा सामान्य क्षति पुगेको हो । व्यक्तिगततर्फ ९ वटा भवनमा आशिंक क्षति पुगेको छ ।
जिल्ला प्रशासन कार्यालय तनहुँ, मालपोत कार्यालय, जिल्ला अदालत तनहुँ, जिल्ला समन्वय समितिको कार्यालय, आन्तरिक राजस्व कार्यालय, खानेपानी कार्यालय, डिभिजन वन कार्यालय, व्यास नगरपालिका, शुक्लागण्डकी नगरपालिका र शुक्लागण्डकी नगरपालिकाका १२ मध्य ८ वडामा तोडफोडसँगै आगजनी गरिएको छ ।

यस्तै ३४ वटा दुई पांग्रे सवारीसाधान जलेर पूर्ण क्षति भएको छ । तीन वटामा आशिंक र एउटा दुईपांग्रेमा सामन्य क्षति भएको जनाइएको छ । निजि ४ वटा दुईपांग्रेमा पूर्ण क्षति हुदाँ ७ वटामा आशिंक र एउटामा सामान्य क्षति पुगेको छ । १७ वटा सरकारी चारपांग्रे सवारी जलेर ध्वस्त भएका छन् । ११ वटा चार पांग्रे सवारीमा क्षति पुगेको हो । यो प्रारम्भिक तथ्याङ्क भएकाले अझै थपिने सम्भावना छ ।

पोखरा– पोखराका युवा सडक सरसफाइमा जुटेका छन् । जेन–जी आन्दोलनले अस्तव्यस्त बनेको सडक सरसफाइमा युवाहरु स्वतस्फूर्त निस्किएका छन् । पोखराको नयाँबजार, महेन्द्रपुल, न्युरोड क्षेत्रको सडक सफा गरिएको हो ।

सरसफाइमा सहभागी युवा रिदेश सुनारले सडक सफा गर्ने जिम्मा पनि जेन–जी पुस्ताकै भएको बताए । घर वरपर आन्दोलनका क्रममा भएको फोहोर सफा गर्न उनको आग्रह छ ।

मंगलबारको जेनजी आन्दोलनले पोखरामा रहेको प्रदेश सभा भवन, मुख्यमन्त्री कार्यालय, जिल्ला प्रशासन कार्यालय, जिल्ला प्रहरी कार्यालय, गण्डकीका भौतिक पूर्वाधारमन्त्री प्रकाशबहादुर केसीको घर, सामाजिक विकास, युवा तथा खेलकुद मन्त्री विन्दुकुमार थापाको घर, व्यवसायिक प्रतिष्ठान, पूर्वमुख्यमन्त्री खगराज अधिकारीको घर, एनसेलको कार्यालय, इलाका प्रहरी कार्यालय बैदाम, नेपाल रेडक्रस सोसाइटी, एमाले र कांग्रेसको पार्टी कार्यालय, शिक्षाा कार्यालय, परिक्षा नियन्त्रक कार्यालय, गण्डकी विश्वविद्यालय लगायतका कार्यालय आगो लगाएर ध्वस्त बनाएका छन् । अबेर रातीसम्म उनीहरुले आगो लगाएपछि पोखराको आकाश धुवाँले ढाकिएको थियो ।

पूर्वगृहमन्त्री जर्नादन शर्मा ‘प्रभाकर’ ले आन्दोलनलाई दमन गरेर रोक्न नसकिने बताएका छन् । दमनले आन्दोलन रोक्न नसक्ने इतिहासले पुष्टि गरिसकेको उल्लेख गरे ।

‘यस विषयमा सरकार र राजनीतिक दलहरू गम्भीर बन्नैपर्छ । सबैले आफ्ना कमजोरीहरू स्वीकार गरी जनतासँग माफी माग्नुको विकल्प छैन’, नेकपा माओवादी केन्द्रका उपमहासचिव शर्माले भने ।

जेन–जी पुस्ताको आन्दोलनलाई दमनका माध्यमबाट नभइ गम्भीरतापूर्वक सम्बोधन गर्दै समाधानको बाटो पहिल्याउन सरकारसमक्ष उनको आग्रह छ । यसमा ढिलाइ गर्नु आत्मघाती कदम हुने बताए ।

‘सामाजिक सञ्जालमाथि लगाइएको प्रतिबन्ध तत्काल फुकुवा गर्न कूटनीतिक पहलमार्फत दर्ता प्रक्रिया अगाडि बढाउनुपर्नेछ’, फेसबुकमा उनी लेख्छन्, ‘भ्रष्टाचारविरुद्ध कडा कदम चाँडै चाल्नुपर्छ र २०४६ साल यताका सम्पूर्ण सरकारी पदाधिकारीहरूको सम्पत्ति छानबिन गर्न स्वतन्त्र र शक्तिशाली आयोग गठन गर्न सरकारले ढिलाइ नगर्नु आवश्यक छ ।’

संयमित र शान्तिपूर्ण तरिकाले आन्दोलन सञ्चालन गर्न आन्दोलनकारी समक्ष उनले अनुरोध गरेका छन् ।

काठमाडौं

राष्ट्रिय स्वतन्त्र पार्टी (रास्वपा) की सांसद सोवित गौतमले वर्तमान सरकारलाई आतंकवादी मानसिकताको सरकार भएको टिप्पणी गरेकी छन् । सरकारले आफ्नै जनता मारेर आतंकवादी मानसिकता देखाएको उनको प्रस्टोक्ति छ ।

सरकारले बन्दुकको साहरामा देशको भविष्य हत्या गरेको उनको भनाइ छ । जेन–जी आन्दोलनमा सरकारले गरेको दमनको विरोध गर्दै रास्वपा नेता गौतमले जनताको रगत बगाएर कुर्सी जोगाउने सोचाइ नै सत्तावादको घिनलाग्दो अनुहार भएको बताएकी छन् ।
‘प्रदर्शनकारीलाई पछाडि हटाउन असंख्य वैकल्पिक उपायहरू हुँदाहुँदै पनि सरकारले सिधैं गोली चलायो । बन्दुकको बलमा प्रतिरोधका स्वर दमन गर्नु वीरता होइन, कायरता हो’, उनको आरोप छ ।

कुनै राजनीतिक स्वार्थ नबोकेका, समानता र न्यायको माग बोकेर सडकमा निस्केका छोराछोरी पुस्तालाई अभिभावक बनेर जोगाउनुपर्ने सरकारले संवादको सट्टा गोली खोलेको उनको भनाइ छ । उनि भन्छिन्, ‘यो हत्या हो । यो शक्तिशालीले निर्बलमाथि शासन गर्ने पुरानो शासकीय चरित्रको पुनरावृत्ति हो । जनताको रगत बगाएर कुर्सी जोगाउने सोचाइ नै सत्तावादको घिनलाग्दो अनुहार हो ।’

अबोध युवामाथि गोली बर्साउने सरकारलाई धिक्कार भएको उनको भनाइ छ । ‘यो जनताको होइन, शक्तिको लोभीहरूको सरकार हो’, उनले भनिन् ।

पोखरा

पोखरामा २४ जना आन्दोलनकारीलाई प्रहरीले नियन्त्रणमा लिएको छ । जेन–जी पुस्ताको आन्दोलनमा सहभागी भएका युवालाई विभिन्न स्थानबाट प्रहरीले नियन्त्रणमा लिइएको हो ।

पोखराको सभागृहबाट सुरु भएको आन्दोलन विभिन्न स्थान हुँदै मुख्यमन्त्री कार्यालय र जिल्ला प्रशासन कार्यलय सहिदचोकसम्म पुगेको थियो । मुख्यमन्त्री कार्यालयमा पुगेपछि प्रहरी र आन्दोलनकारीबीच मुठभेडको स्थिती सिर्जना भएको थियो । प्रहरीले भिडलाई नियन्त्रणमा लिनलाई अश्रृग्याँससँगै पानीको फोहोर प्रहार गरेको थियो ।

कास्कीको जिल्ला प्रशासन कार्यालय आसपासको क्षेत्रमा अनिश्चितकालिन निषेधाज्ञासमेत जारी गरिएको छ ।

काठमाडौं

देशभर जेन–जी पुस्ताको आन्दालेन चर्किएपछि नेकपा माओवादी केन्द्रले जनतासँग माओवादी मध्यपहाडी (पुष्पलाल लोकमार्ग) जनजागरण अभियान स्थगित स्थगित गरेको छ । गोरखाको भीमसेन थापा गाउँपालिका–३ टारिफाँटमा उपब्लध पदाधिकारीको आकस्मिक बैठक बसेर अभियान स्थगित गर्ने निर्णय गरेको हो ।

मंगलबार काठमाडौंमा पूर्ण पदाधिकारी बैठक बस्ने निर्णय माओवादीले गरेको छ । जेन–जी पुस्ताको प्रदर्शन र देशको समसामयिक अवस्थालाई मध्यनजर गर्दै अभियान स्थगित गरेको जनाइएको छ ।

जेन–जीले उठाएका सामाजिक सञ्जालमाथिको प्रतिबन्ध हटाउने र भ्रष्टाचारविरुद्धका मागहरूलाई तत्काल सम्बोधन गर्न माओवादीले माग गरेको छ । स्थिति थप बिग्रिन नदिन जिम्मेवारीपूर्वक ठोस कदम चाल्न सरकारसमक्ष माग गरेको हो ।

पोखरा

जिल्ला प्रशासन कार्यालय कास्कीले अनिश्चितकालिन निषेधाज्ञा जारी गरेको छ । कास्कीकी प्रमुख जिल्ला अधिकारी रुद्रादेवी शर्माले अनिश्चितकालिन निषेधाज्ञा जारी गरेकी हुन् ।

जेन–जी पुस्ताको आन्दोलनले पोखरा महानगरपालिकामा हुन सक्ने प्रदर्शन, जुलुस, हुल दङ्गा र झडपका कारण प्रतिकूल अवस्था सिर्जना भई शान्ति सुरक्षा भङ्ग हुन सक्ने परिस्थितिलाई दृष्टिगत सोमबार दिउँसो २ बजेदेखि अर्को आदेश जारी नभएसम्मका लागि निषेधाज्ञा जारी गरिएको शर्माले जानकारी दिइन् ।

उनका अनुसार शहिदचोक आसपासका क्षेत्रमा निषेधाज्ञा लागू हुनेछ । सहिदचोकको पूर्वतर्फ वाइचोकसम्म, पश्चिमतर्फ फिस्टेलगेट बैदामसम्म, दक्षिणतर्फ राष्ट्रबैंकचोक, नेपाल पर्यटन वोर्डको कार्यालय अगाडी ड्यामसाईडसम्म र उत्तरतर्फ मालपोत कार्यालय कास्कीसम्मको क्षेत्रमा निषेधाज्ञा जारी गरिएको हो ।

निषेधाज्ञा जारी गरिएको क्षेत्रमा ५ जनाभन्दा बढी व्यक्ति भेला हुनलाई रोक लगाइएको छ । अनसन, धर्ना, घेराउ, जुलुस, प्रदर्शन तथा सभा गर्नलाई पनि प्रशासनले रोक लगाएको छ ।

‘आदेशको उल्लंघन गर्ने वा आदेशको पालना गर्ने गराउने कार्यमा अवरोध गर्ने जो सुकै उपर प्रचलित कानून बमोजिम कारवाही हुने व्यहोरा जानकारी गराइन्छ’, जिल्ला प्रशासनले जारी गरेको आदेशमा भनिएको छ ।

काठमाडौं

नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले जेन–जी आन्दोलको स्थिति बिग्रन नदिन सरकार जिम्मेवार बन्नुपर्ने बताएका छन् । जेन–जी ले उठाएका सामाजिक सञ्जालमाथिको प्रतिबन्ध हटाउने र भ्रष्टाचारविरुद्धका मागलाई तत्काल सम्बोधन गर्नुपर्ने उनको भनाइ छ ।
उनी भन्छन्, ‘स्थिति थप बिग्रिन नदिन सरकारले जिम्मेवारीपूर्वक ठोस कदम चालोस् ।’

जेन–जी पुस्ताको प्रदर्शनका क्रममा भएको दुःखद घटनाले स्तब्ध र गम्भीर बनाएको उनको भनाइ छ । ‘प्रहरीको गोली लागेर मृत्यु भएका युवाप्रति हार्दिक श्रद्धाञ्जली अर्पण गर्दछु। घाइतेहरूको शिघ्र स्वास्थलाभको कामना गर्दछु’ पूर्वप्रधानमन्त्रीसमेत रहेका दाहालले फेसबुकमा लेखेका छन् ।

पोखरा

आन्दोलनमा उत्रिएको जेन–जी पुस्ताले गण्डकीको मुख्यमन्त्री कार्यालयमा आगजनीको प्रयास गरेको छ । नाराबाजीसहित पुगेको जेन–जी आन्दोलनकारीले आगजनीको प्रयास गरेका हुन् ।

प्रहरीले आन्दोलनलाई मत्थर पार्न अश्रुग्याँस प्रहार गरेको छ । अश्रुग्याँस र पानीको फोहोरा प्रहार गरेपछि प्रहरी र आन्दोलनकारीबीच मुठभेडको स्थिती सिर्जना भएको छ ।

पोखराको सभागृहमा स्वतस्र्फूत भेला भएका युवाहरु नाराबाजीसहित सहिदचोकबाट नजिकै रहेको मुख्यमन्त्री कार्यालय क्षेत्रमा पुगेका हुन् । अहिले प्रहरी र आन्दोलनकारीबीच हानाहानको स्थिती छ । आन्दोलनकारीले सरकारी सवारी तोडफोडसमेत गरेका छन् ।